جلست أحتسي فنجان فترة العصركعادتي فبدأت قهوتي تهمس لي
القهوة :عساج من العايدين الفايزين
أنا:جزاج الله خير أقصد.. يعود علينا و عليج ..بس ليش؟
القهوة: شفيج نسيتي
أنا :أووو.. راح عن بالي صج رمضان قرب .. الله صج أشتقنى له
القهوة : منو؟
أنا : شفيج ..رمضان شهر الخير و الطاعة شهر تشتغل فيه كل حواسنا كل شي فينا له ذكرى معاه
القهوة:تصدقين أنا دخلت بيوت وايد و رمضان في كل بيت غير و له نكهة خاصة
أنا : شلون ؟
القهوة :أنا أقولج في بيوت تستقبل رمضان كالآتي:
(البيت الأول)
أم ضاري: أقول بو ضاري اليوم بنروج الجمعية
أبو ضاري طبعا قاعد يشلع ما أدري شنو بأصابع ريله
أبو ضاري : أشحقه <من طرف خشمة و رافع طرف شفته العلوية اليسار إمتعاضاً>
أم ضاري : هووو.. بعد أشحقه .. حق رمضان
أبو ضاري : أيـيي و أنا قول ليش اليوم الدوانيات فاضية أثاري الربع رايحين يجيلون ويا الأهل .. عاد تصدقين يام ضاري أنا أحب أجيل ..
تقاطعة أم ضاري: أدري معاي <و هي مستانسة >
أبو ضاري : لايا بنت الحلال لا يروح فكرج لبعيد أنا أحب أجيل لرمــضــان ..التجيل لرمضان له طعم ثاني و الشهية مفتوحة و اتلذذ بس على طاري الأكل
أم ضاري : جبح و أنا اللي فرحانة
أبو ضاري : لا أتغشمر وياج يا أم ضاري رمضان اللي فات من دونج كانت حالتنا فيه صعبة و كسيفة أنت عين السيح
أم ضاري : يا بختي
أبو ضاري : أويـــلاه عليج يا أم ضاري أحنا رمضان اللي فات عورتنا بطونا من أكل المطاعم و عرفنا وقتها قدرج
أم ضاري : أثاري اللي هامك بطنك يا البطيني طلع قدري عندك جدر ينحط على السفرة .. عيل خذ هالخبر ترى أنا رمضان هذا برمض نصه عند أمي و إن يازت لي القعدة بكمله عندها .. يا بو جدر
و هدته أم ضاري و راحت و قعد يفكر
بو ضاري : أنا شسويت .. الحين منو بيطبخ لي.. لي نص الشهر؟؟؟
***
القهوة : و هذا البيت الأول خربوا رمضان عليهم و ضيعوا الأجر قبل لا ياخذونه بمشاحناتهم و القلوب الشايلة و ما تذكروا برمضان غير بطونهم .. و المرة ناوية تضيع رمضانها تسب و تحقد عليه و الريال نسى أنه لي قرب رمضان معناته صار وقت الكلام الطيب.
أنا : و البيت الثاني
القهوة : و البيت الثاني يا محفوظة السلامة
(البيت الثاني )
بو علي : هذا .. لا مو هذا ..أي هذا اللي أحبه
أم علي: بس هالعصير مو ذاك الزود
بو علي :لا حلو أنا و حمود نحبه ..حطيه زيــــــــــن أهووو
أم علي :أقول بو علي خل نكسب وقت قبل لا تنزحم الجمعية الحين خو يهلون و ما يبقا شي
بو علي: حشى سباق مو رمضان !!!
أم علي : لا تكثر لغوة روح يب لنا 7 جياس قمردين .. و يب 20 قوطي كريم كرمل .. و عجينة بيردز أي و عجينة السمبوسة و قطايف و ماي ورد و مكسرات
بو علي : يا معودة ما ثبت كتبيهم على هالورقة هاج و هذا قلم .. يللا بسرعة بدو الناس يهلون
أم علي : هاك بس زتات و اللي يعافيك وراي الكبة لحد اللحين ما سويتها و السمبوسة بعد ما لفيتها
.. يتوجه بو علي نحو قسم القمردين و يبتدي يضع أجياس القمردين بالعربانة و بجانبه رجل آخر بو علي وصل لي الجيس السادس وصل لي السابع و مابقى غير جيس واحد و كان الرجل اللي جمب بو علي ماد أيده نحو الكيس فأنتبه أبو علي و لقف الجيس قبله فنظر الرجل لبو علي و بادله النظرة بو علي ..الرجل كان ينظر نظرة الحاقد لأنه أم العيال اللي يمه ناوية توديه جمعية ثانية علشان يكملون العدد و أبو علي ينظر نظرة واحد منتصر و قام يرفع حاجبيه و أنزلهما للرجل بفرح و مكر و يهز رأسه يمين و يسار مختالا و متفاخرا بنفسه و يلقي نظرة على غنيمته ألا و هي كيس القمردين ثم يقب (يهرب)بوعلي مسرعا و منتصرا ،أكمل أبو علي بقية المشتريات ثم توجه لأم علي، فإذ به يرى بجانب أم علي أحد جاراتهم فوقف بعيدا منتظرا أن تذهب هذه المرأة ،وقف بو علي في مكان غير بعيد عنهم و قاط أذنه يتسمع الحجي..
أم علي : واااي هالناس جنهم مو شافين خير و جنهم ما يآكلون إلا برمضان
أبو علي: طاع من يتكلم خخخخ < طبعا هالكلام يدور في نفسه>
الجارة : أي و الله ..قطيعه <طبعا تمشي و معاها عربانتين متروسين على الآخر و مو عارفة شلون تدزهم و كل اللي في البيت 4 أشخاص>
أم علي : تضحك هههههه < بسرها طبعا الكلام السابق كانت تعني فيه هالجارة لأنها أخذت أغلب الأشاء الي تبيها أم علي و ما أقدرت تحصلهم >
الجارة : دريتي يقولج برمضان على القناة الأولى بيحطون خوش مسلسل يقطع القلب يبجي حده و على قناة اخرى بيحطون خوش مسلسل في ناس يتبهللون على الشاشة مثل الميانين .. و الساعة 12 الظهر بيحطون برنامج طبخ
أبو علي: بالله عليهم هاذي حزة الناس تحط فيها برنامج الطبخ علشان يوصل الحلج لي الركب شنو هالقسوة هذا عذاب، لقيتها ما في إلا أقول حق رفيجي بو فهد يكتب مقال بهالموضوع و يشلخهم فيه .. بس أنا غرامي هالبرامج خوش شيف أسامة .. عيل خل أفكر بالخسايرو أدرس الموضوع عدل بعدين أقول لبو فهد و لا أقول لهم يرحلون هالبرامج وقت السحور ليش الواحد هالحزة توه فاج من تـــتــــنــيــحــــة ما بعد الفطور و ناوي على هجمة يديدة على السفرة ..إي امبلا خوش فكرة ما شاء الله علي
أم علي : ما شاء الله عليك < و تطق بو علي على ظهره >
أبو علي: هاذي تقرا أفكاري < و ينظر لها متنح فاتح عيونه على مصراعيها>
أم علي : ما شاء الله عليك ليش قاط عيونك عند المرة و طايح له خز فيها
أبو علي: أنا ما قطيت عيوني قطيت أذوني
أم علي :هاااااا
أبو علي: لا مو قصدي <بينه و بين نفسه أنا شقاعد أخربط>
أم علي :أمبلى شفتك
أبو علي : انا شلون شفتها و أنا معطيكم ظهري و مجابل قواطي دجاج النجتس... كاااا أخذي قطع دجاج كوكي
أم علي : ألحين خل نحاسب و بالبيت نتحاسب حلايا هالوي .. أنا ما أدري من قص علي يوم خذتك طاع ويهك ..ويهك و يه أبوي واحد يا حلايا الشيبه المراهق
أبو علي :أم علي حشمي نفسج أحسن و نكمل صراخنا بالبيت .
***
القهوة:و هذا البيت فيه الصنف الثاني اللي يتسابقون على أغراض الجمعية و همهم المسلسلات
أنا : حدهم ناس متفرغين و ما عندهم سالفة و مضيعين رمضان على شهوات سخيفة ... انزين و البيت الثالث
(البيت الثالث)
أبو طلال:أقول حسين روح الجمعيه و جيب لي و لمك كل واحد رصيد 10 دنانير و شوف باجي اخوانك جم يبون و تعال قولي.. و بالمرة عب السيارة بانزين
حسين: حاضر يبا تآمر على شي بعد
أبو طلال : لا تسلم قواك الله يا وليدي
و يطلع حسين ... و بعد مدة تدخل أم طلال
أم طلال : ترى حسين خذا مني فلوس لخوانه عطيته 20 دينار .. بو طلال أنا أحاجيك ما تسمع ؟؟؟< معصبة>
أبو طلال قاعد يطوي أصابعه جنه يعد و يتمتم بكلمات أمي لا طلول أي و بعدي عمتي حصة أي أمبلا لا
أم طلال: بو طلال <معصبة و ويها حمر>
أبو طلال: لا أسمعج بس قاعد أحسب و أفكر
أم طلال: أبشنو ؟
أبو طلال :شوفي أول يوم برمضان بعزم أهلي على الفطور.. و ثاني يوم بنعزم أهلج .. الله يعينه عليهم
أم طلال: عاد حدك على أهلي هذا و أنا ساكته ما قلت لك أهلي قبل
بو طلال: بعد !!.. يللا مشكورة على التنازل و ما قصرتي و آسفين بعد .. و ثالث يوم بنروح حق عمتي حصة وأنا و العيال و قولي لهم يتيمعون هني مانبي يصير نفس رمضان اللي طاف حوسة .. و اليوم الرابع بهاليوم بس أبي عيالي و حريمهم و أحفادي ما نبي خواتج علشان ما تحكريني بالدوانية
أم طلال :أيـــي .. و خامس يــــــــــــــوووم ...
أبو طلال : أهلي من السعودية بيجون ابيج تبيضينها و ما تقصرين معاهم و بيقعدون عندنا 5 أيام و بيحدرون .. عند أخوي بو وليد بعدها ..و أحنا بعد بنروح له معاهم لأنه عازم العايلة كلها على الفطور ... و عاشر يوم من ارمضان أمي قايلة بتعزمنا و تبينا نروح عندها من عاشر و 11 و 12 و 13 تقول تبينا عندها أيام القرقيعان ..و 14 و 15 قرقعوا في بيت اهلج و انا بكمل بتفطر عند أمي .. و أكيد الربع بتصير غبقاتهم و فطورهم بالأيام ما بين 16 لي 19 ..و
أم طلال : لا عاد باجي الايام ما نبي عزايم
أبو طلال: أنا أصلا كنت بقول هالشي بس زوارت العيال لازم كل يوم
أم طلال : أنزين عاد أنا في أيام ما ابي فيها حتى العيال ما يمديني أسوي شي سنع للفطور
أبو طلال: ليش إن شاء الله ؟
أم طلال : بنروح انا و البنات و الأحفاد نتجهز للعيد
أبو طلال :خير إن شاء الله
حسين : يبا كـــــــا يبت الكروت بغيت شي
بو طلال : لا بس دزلي مسجات من هذيلا اللي تدزهم على ربعك خل نبارك
أم طلال :خو بارك بالتلفون مال البيت
بو طلال : عدال انتي
أم طلال : انا ابارك بالمسجات و تلفون البيت .. القراب بتلفون البيت و البعاد و اللي ما لي خلقهم مسج
أبو طلال : و انا مثلج بعد
***
القهوة : و هذا البيت الثالث
أنا : أشدعوه شالزيارات اللي ما تخلص من اول رمضان و لا يوم في فكة ... و يوم قربوا على العشر الأواخر بيقضونها سوقه باسوقه ( يعني كله بالسوق ).. و ين الصلاة و ين القرآن صج صلة الرحم حلوة بس يعني خل يخففون شوية و ينوعون بالطاعة .. بعد حتى النية بهالزوارة ماهي طاعة و لا صلة رحم بس تأدية واجب و السلام و طق حنك و كلام فاضي و الحريم حش و الريال بعد حش بس بصورة مُمَوهة
القهوة : شدعوة ما قال لهم طلال هالكلام بس كل ما نطق جعموه و عطوه أذن من طين و أذن من عجين ...أهو على العموم مايزور كل يوم لا أهو و لا مرته...العشر الأواخر بعد يحاولون ما يزورون إلا جم ساعة و يمشون ... و ساعات بعد طلال يعتكف .
أنا : زين يسوي هذا المفروض ... أنزين و البيت الرابع
القهوة : قلته بيت طلال
أنا : لا أبي قصة نفس باجي قصصج اللي تشوق
القهوة : يمه منج وحدة تسحبين الحجي
أنا: يللا عفية كملي بعد أبي بيوت أكثر
القهوة :و البيت الرابع أقول لج عنه باجر
أنا : لا ما بي مو بكيفج قولي لي ألحين بعرف
القهوة: شفيج راسي عورني و بردت باجر يصير خير
أنا : باجر مو تنسين
القهوة : عاد ذكريني
أنا: أفااا عليج اذكرج و نص أنا أحب الحزاوي ؛)
و للبيوت بقية ..راح نكمل أنا و قهوتي سوالفنا ..حياكمـ
*** إي و نسيت أشكركم و أقولكم ما قصرتوا
على المرور الوافي و الراقي و إن شاء الله ما مليتو ؛) ***
